Pyetjet tuaja drejtuar mjekut tuaj në rastet e sëmundjeve që mund të keni janë mjaft të rëndësishme për informim si dhe për masat që duhet të merrni për të trajtuar sëmundjen. Niveli i informimit varet në mënyrë të konsiderueshme nga cilësia e pyetjeve që ju i drejtoni mjekut tuaj. Pyetjet e mira janë një pjesë e rëndësishme e zgjidhjes së problemit, kurse pyetjet e këqija nuk e ndihmojnë atë, përkundrazi; ato shtojnë konfuzionin tuaj dhe mungesën e një qëndrimi të duhur ndaj sëmundjes. Prandaj, është mjaft e rëndësishme të dini se si të pyesni mjekun. Për këtë qëllim, për të ndihmuar pacientin, kemi përgatitur dhe publikuar tri paketa pyetjesh themelore për tri aspekte të shërbimit mjekësor: diagnozës, trajtimit mjekësor dhe testeve diagnostikuese:
Pyetjet themelore rreth Diagnozës:
- Cila është diagnoza ime?
- Cilat janë shkaqet (faktorët e riskut) që e kanë shkaktuar këtë sëmundje?
- Cilat janë simptomat e sëmundjes dhe më duhet t’ju lajmëroj kur ato të shfaqen?
- A do të ndikojë kjo në cilësinë e jetës time dhe në ç’mënyrë?
- Cilat janë ndryshimet që duhet të bëj në mënyrën e të jetuarit?
Pyetjet themelore rreth Trajtimit mjekësor:
- A mund të kurohet sëmundja ime?
- Cilat janë trajtimet mjekësore për diagnozën time? Cilat janë epërsitë dhe dobësitë e secilit prej tyre? Kush prej tyre është më i përshtatshmi për mua?
- Sa sukses garanton ky trajtim dhe çfarë problemesh zgjidh?
- Kur do të fillojë trajtimi dhe sa do të zgjasë?
- Cilat janë rreziqet dhe efektet anësore të lidhura me këtë trajtim?
- A ka ushqime, barna ose aktivitete të cilat duhet t’i shmang gjatë këtij trajtimi?
- Nëse trajtimi im përfshin marrje të barnave, çfarë duhet të bëj nëse harroj të marr një dozë?
Pyetjet themelore rreth Testeve Diagnostikuese
- Çfarë lloje të testeve duhet të bëj?
- Çfarë mund të pres dhe të kuptoj nga këto teste?
- A duhet të bëj ndonjë gjë të veçantë për t’u përgatitur për këto teste?
- A kanë ndonjë efekt anësor ose rrezik këto teste?
- A do të kem nevojë për teste të tjera më vonë?
Referencat
National Institutes of Health; web: www.nih.gov